TANZANIA YAFANIKIWA KUMKAMATA GAIDI ERDOGAN

      MOJA YA MILIPUKO ERDOGAN ANASADIKIWA KUSHIRIKI JIJINI NAIROBI-KENYA

Polisi ya Kenya inasema kuwa Emrah Erdogan ni raia wa Ujerumani mwenye asili ya Uturuki.

Kenya inadai kuwa alivuka mpaka mapema mwezi Mayi kutoka Somalia ambako alishiriki mapigano kwa niaba ya kundi la Al Shabab.

Zaidi ya watu 30 walijeruhiwa katika mlipuko ambao wakuu wa Kenya wanasema ulisababishwa na bomu hilo.Kumekuepo na sintofahamu juu ya chanzo cha mlipuko huo- ambapo Maofisa wa Polisi walianza kwa kusema kuwa mlipuko huo ulisababishwa na hitilafu ya umeme.

Mara kwa mara kundi la Al Shabab limetishia kufanya mashambulizi ya kulipiza kisasi nchini Kenya kwa sababu nchi hio ilituma vikosi nchini Somalia.

Serikali ya Kenya inalituhumu kundi la wapiganaji wa Al Shabab kuhusiana na utekaji nyara wa watu kadhaa kwenye ardhi yake pamoja na kusababisha hali ya wasiwasi kwenye mpaka baina yake na Somalia.

EMRAH  ERDOGAN

Polisi ya Tanzania imethibitisha kuwa Erdogan alikamatwa na kuahidi maelezo zaidi baada ya kumuhoji.

Erdogan ni miongoni mwa watu wanne ambao Polisi ya Kenya imekua ikiwasaka tangu kutokea kwa mlipuko huo.

Ilisambaza picha yake na kuomba habari kuhusu mahali alipo.

Erdogan, anayejulikana pia kama Salahuddin al-Kurdi, inaaminika kuwa aliwahi kusafiri kwenda Waziristan huko Pakistan ya kaskazini magharibi mwaka 2010 ambako alijiunga na kundi la wakereketwa wenye imani kali kabla ya kuelekea Somalia mwaka jana, kwa mujibu wa shirika la habari Reuters.

Mapema mwaka huu, vikosi vya AU vinavyounga mkono serikali ya mseto nchini Somalia viliongezea idadi ya askari wake kutoka 12,000 hadi 18,000 kujumuisha vikosi vya Kenya vilivyoingia nchi hio mnamo mwezi Oktoba mwaka jana kuwasaka wapiganaji wa Al Shabab.

Kundi la Al-Shabab, lililojiunga na mtandao wa al-Qaeda mapema mwaka huu imefahamika lilisajili wapiganaji wa kigeni kadhaa -wengi ambao wamewahi kupigana huko Iraq na Afghanistan